მთავარი

სიმბოლო გველი

დატოვე კომენტარი

რადგან 2013 გველის, უფრო სწორად კი შავი, წლის გველის წელია, მოდით გაგიზიარებთ ჩემს ცოდნას გველის სიმბოლოს შესახებ. ნუ მცირე შევასალის სახით ვიტყვი იმას, რომ გველები ჩვეულებრივ არ იკბინებიან, ზუსტად იგივე შანსია თავს დაგესხათ გველი და ცოტა უფრო ნაკლებიც, რაც მაგალითად ძაღლის შემთხვევაში. მე მაგალითად ძაღლების მეშინია და გველების არა. იმიტომ რომ ძაღლებს შემოუღრენიათ და დაკბენის მცდელობაც ქონიათ, გველებს კი არა. მიუხედავად ჩემი განუზომელი ცნობისმოყვარეობისა მათი აგებულების მიმართ, განსაკუთრებით ბავშვობაში )))

00-03-429-000

გველი ერთ-ერთი უძველესი სიმბოლოა და ის თითქმის ყველა ძველ კულტურაში გვხვდება. ამ სიმბოლოს ხიბლი იმაშია, რომ მას ორმაგი მნიშვნელობა აქვს და ხშირად ურთიერთგამომრიცხავიც. ბევრ არქაულ კულტურაში გველი მიწისქვეშეთის სამფლობელოს, ასე ვთქვათ მკვდრების სამეფოს სიმბოლო იყო. შესაძლოა იმიტომ რომ ის მიწაში ბინადრობს ან იმიტომ რომ ძველად და ახლაც სხვადასხვა რელიგიები სხვადასხვაგვარად აღწერენ სიკვდილს, მაგრამ ის ყველა შემთხვევაში გარდასახვასა და ტრანსფორმაციას განასახიერებს. გველს უნიკალური უნარი აქვს კანი გამოიცვალოს. რაც შეეხება მის ორმაგ მნიშვნელობას, მაგალითად ბიბლიაში გველი განასახიერებს ეშმაკს, რომელმაც აცდუნა ევა და ამავე დროს ის მოსეს ეხმარება უდაბნოში.

გველის სიმბოლოს სხვადასხვა საინტერესო მნიშვნელობები შეიძლება შეგხვდეთ, სადაც აღნიშნულია რომ ადამიანმა ისევე როგორც გველმა უნდა დატოვოს თავისი სხეული და განახლებულმა შეაბიჯოს ახალ სამყაროში. გველი ტოვებს ქვაზე შხამს წყალში შესვლისას, რათა მისი სისპეტაკე არ აამღვრიოს და ამიტომ ის შიშველ ადამიანებს არ კბენსო. არ ვიცი ბევრი ფიქრობდა ალბათ რომ შიშველი პირდაპირი მნიშვნელობით იყო ნახსენები, თუმცა არ მგონია თქვენმა გენიტალიებმა გიხსნათ გველისგან ))) ბავშვობაში, როცა დავსდევდი და ვიჭერდი გველებს, ხელში ვათამაშებდი და ვიკვლევდი მათ ყველა უჯრედს, როგორც ეს შეიძლება ბავშვა გააკეთოს ჩემთვის არასდროს უკბენიათ. მოგვიანებითაც მომიწია რამდენიმე ასეული მეტრის გავლა წელამდე ბალახში სადაც ფიზიკურად ვგრძნობდი როგორ დასრიალებდნენ გველები ჩემს ფეხებზე და არცერთ მათგანს არ უკბენია. უცნაურია მაგრამ გველების არასდროს მეშინოდა, მათ დიდ პატივს ვცემ, დიახ. იმიტომ რომ ძალიან საინტერესო არსებაა და მესიმპატიურება. ყოველთვის ვიყავი გულწრფელი, როცა მათი არ მეშინოდა და ალბათ ვიყავი შიშველიც, ამიტომ შეგიძლიათ ტანსაცმლის გახდით არ დაიწყოთ როცა გველს დაინახავთ, ემოციების გახდით დაიწყეთ. გრძნობენ 🙂

al_ouroboros2

გველის სიმბოლოს სხვადასხვაგვარადაც გამოსახავდნენ, მათ შრის ყველაზე პოპულარული არის გველი, რომელიც საკუთარ კუდს კბენს ე.წ. ურობოროსი, ეს არის სიმბოლო უსასრულობის, უკვდავების, განახლების და ციკლის დაბრუნების. ალქიმიკოსები ამ სიმბოლოთი გამოსახავდნენ იმ პროცესებს რომელიც ციკლურად მიმდინარეობს, მაგალითად აორთქლება, კონდენსაცია – მრავალჯერადი განმეორება. ვერ გამოვრიცხავთ იმ ფაქტს რომ გველს ასევე ნეგატიურ მნიშვნელობასაც ანიჭებენ და ეს პირველ რიგში მის შხამს უკავშირდება, თუმცა ამავე შხამს უკავშირდება განკურნებაც, ამიტომ არის გველი ასეთი წინააღმდეგობრივი სიმბოლო.  ძველ ეგვიპტეში გველი ურეუსი რომელიც ფარაონის გვირგვინს განასახიერებდა მტრებს შხამით იგერიებდა, ის ასევე მზის დისკოს ეკვროდა გარს.

a_5862ead4 (1)ცენტრალურ ამერიკაში აცტეკებთან კოატლი მნიშვნელოვან სიმბოლოდ გვევლინება. კოატლი – გველი კალენდრის მეხუთე დღის მფარველია. ამ დღეს დაბადებულები უარყოფითად ხასიათდებიან. როგორც უსახლკაროები და ღარიბები. მაშინ როდესაც კეტცალი არის ფრინველი ძალიან ღრმა მნიშვნელობით განსაკუთრებით რელიგიურ საკითებში, დაჯილდოებული სიბრძნით და სხვა სიმდიდრეებით. აცტეკებთან კარგად ჩანს გველის კიდევ ერთ თვისებაზე ხაზგასმა, გველი როგორც ფრინველი კვერცხიდან იჩეკება. შესაბამისად აცტეკებმა ეს პროცესი დაუკავშირეს მის ორმაგ სახეს და უკიდურესი უარყოფითი და დადებითი მხარეები ამ ორი სიბოლოების, როგორიცაა კოატლი და კეტცალი გააერთიანეს ერთში და მას ეწოდება კუკულკანა, ეს სიმბოლო აერთიანეს გველისა და ფრინველის როგორც მიწისა და ცის სიმბოლოებს. ფრინველისა და გველის პოლარულობა ყველაფერთან ერთად მეხიკოს გერბზეცაა გამოსახული აცტეკურად ტე ნოჩტიტლან, მასზე გამოსახულია კაკტუსზე მჯდომიარე არწივი გველით კლანჭებში. ეს სიმბოლო განასახიერებს ორი უკიდურესობის კავშირს.

ეზოთერულ სისტემებში დახვეული გველი – კუნდალინი სასიცოცხლო ენერგიის სიმბოლოც არის.  გველისმაგვარი არსებები ნახევრადღვთაებრივი ნაგები კი ასევე დიდ როლს თამაშობენ ძელ ინდურ მითოლოგიაში. ნაგი განასახიერებს მიწიერი საგანძურის მცველს. ისინი კეთილი სულები არიან, რომლებიც გველის ტანითა და ადამიანების თავით გვევლინებიან. გველი თავისი კანის გამოცვლის უნარით – განახლებას, ხოლო წყლის სტიქიასთან მჭიდრო კავშირით ნაყოფიერებას განასახიერებდა.

ჩინეთში გველი – შე, ზოდიაქოს მეხუთე ნიშანია. ითვლება ცბიერ და საშიშ ნიშნად. ამავე დროს გველები დადებით მნიშვნელობას იძენენ, რადგან მდინარის კალაპოტი ზემოდან წააგავს გველს თავისი ფორმით, ამიტომაც მათ წყალთან უფრო მეტად აკავშირებენ. გარდა ამისა არსებობს ლეგენდა, რომლიც მიხედვითაც მადლიერ გველს რძით დაპურების შემდეგ, საჩუქრად მოაქვს მარგალიტი ოკეანეების სიღრმეებიდან. ამიტომაც აღმოსავლეთში გველი სიბრძნის მატარებელთანაც ასოცირდება.

სამხრეთ აფრიკულ კულტურაში გვხვდება გიგანტური გველები, რასაც ადასტურებს კლდეზე გამოსახული ნახატები. მათ ღვთაებრივი შესაძლებლობებიც ქონდათ, ისინი წვიმას იწვევდნენ და ზოგადად წყალს განასახიერებდნენ. გარდა ამისა მითებში ისინი რქებითაც გვხვდება, რითაც ისინი უფრო მეტად დრაკონს მოგვაგონებენ.

nagi

გველის არა მარტო მნიშვნელობებია მსგავსი სხვადასხვა კულტურებში, არამედ მსგავსი ლეგენდებიც კი არსებობს თავისი შინაარსით. მაგალითად იაპონიაში არის ლეგენდა, რომელიც ძალიან გავს ჰერაკლესა და ცხრათავიანი ჰიდრას შებრძოლების ბერძნულ მითს. იაპონური ლეგენდის მიხედვით ქარიშხლის ღმერთი სუსანოო შეებრძოლა რვათავიან გველს იამატანო ოროტისს და დაამარცხა ის, ხოლო მის კუდში აღმოაჩინა მახვილი, რომლის საშუალებითაც დატყვევებული პრინცესა – ინადახიმე გაათავისუფლა. გველის დამარცხების ლეგენდას სხვაგანაც შეხვდებით, როგორიცაა მაგალითად იგივე თეზევსის ანდა წმინდა გიორგის შებრძოლება გველთან, როგორც ქართულ თარგმანშია ნახსენები – გველეშაპთან.

რაც შეეხება გველის წელს მე პირდად ვერ ვიტყვი რომ მხოლოდ აღმოსავლური ჰოროსკოპით ხელმძღვანელობა სწორია. ზოგადად სიმბოლოებს დიდი დატვირთვა აქვს, თავისი ენერგეტიკა. ამიტომ ჯობია საერთო კონტექსტში განვიხილოთ ეს სიმბოლო. მოკლედ რომ ვთქვა, წელს ალბათ კანი უნდა გამოვიცვალოთ და ტრანსფორმაცია განვიცადოთ, იმისთვის რომ წარმატებას მივაღწიოთ. წარმატებას გისურვებთ ამაში 🙂

 

Advertisements

მარტინ შულმანი კარმული ასტროლოგია – ალეგორია (თარგმანი)

%(count)s კომენტარი

დადგა დილა და ღმერთი წარსდა თავისი 12 შვილის წინაშე, დრო იყო ნიჭის გაცემის.

“შენ ვერძო გაძლევ თესლს, იმისთვის რომ დათესო, ყოველი მათგანი შენს ხელში გაასმაგდება და არნახულ ნაყოფს გამოისხამს, შენ არ გექნება დრო ნახო როგორ იზრდება ნაყოფი, რადგან ყოველი მათგანი უფრო მეტ თესლს მოგცემს, ვიდრე დათესვას შეძლებ. შენ იქნები პირველი ვინც ადამიანის გონებას ჩემი იდეებისთვის ნიადაგს მოუსინჯავს. მაგრამ ეს შენი საქმე არ არის დააკვირდე ამ იდეებს. შენი ცხოვრებია არის მოქმედება, ერთადერთი – მოქმედება, რომელსაც მე შენ განიჭებ. გაუღვიძო ადამიანებს სურვილი შეიგრძნონ ჩემი შემოქმედება. შენი კეთილი საქმეებისთვის კი, მე შენ გაჩუქებ თავმოყვარეობის ნიჭს”

“შენ კურო, გაძლევ ნიჭნს საკუთარი თავის სუბსტანციაში მოქსცევისას. შენი საქმე ძალიან მნიშვნელოვანია და მოითხოვს შემოქმედებას, რადგან შენ უნდა დაასრულა ყველაფერი რაც შენამდე დაწყებული აქვს ვერძს, იმისთვის რომ მოსავალი ქარმა არ წაიღოს. შენ არ უნდა შეიტანო ეჭვი, შეწყვიტო შუაგზაში საქმე და დაეყრდნო სხვებს საქმის კეთებისას. ამისთვის მე განიჭებ შენ ნიჭს – ძალას. გამოიყენე ის სიბრძნით”

“თქვენ ტყუპებო გაძლევთ უპასუხო შეკითხვებს, იმისთვის რომ ადამიანებს დაეხმაროთ იმის შეცნობაში, რასაც ყოველდღე დაინახავენ. შენ ვერასდროს მიხვდები რატომ გისმენენ ან რაზე საუბრობენ ადამიანები, მაგრამ პასუხების ძიებაში შენ იპოვნი ჩემგან ბოძებულ ნიჭს – ცოდნას”

“შენ კირჩხიბო, გაძლევ ამოცანას ასწავლო ადამიანებს როგორ იყვნენ ემოციურები, ასწავლე მათ ტირილი და სიცილი, იმისთვის რომ ყველაფერმა რასაც ხედავენ და რაზეც ფიქრობენ კმაყოფილების გრძნობით აავსოთ. ამისთვის მე განიჭებ მეოჯახეობის ნიჭს, იმისთვის რომ შენი სისავსე გამრავლდეს.”

“შენ ლომო გაძევ დავალებას ჩემი ქმნილებები მთელი თავისი დიდებულებით და ბრწყინვალებით წარუდგინო ადამიანებს. მაგრამ უნდა იყო ფრთხილად სიამაყესთან და არ დაივიწყო, რომ ისინი ჩემი ქმნილებებია და არა შენი. თუ ამ რჩევას არ გაითვალისწინებ, ადამიანები შეიძულებენ შენს ნამოქმედარს, თუ გაითვალისწინებ ისინი პატივს გცემენ. ამისთვის კი მე განიჭებ სამართლიანობის ნიჭს”

“შენ ქალწულო გაძლევ ამოცანას გამოიკვლიო და გაანალიზო ყოველივე რასაც ადამიანები გააკეთებენ ჩემი ქმნილებებისგან. შენ უნდა ყურადღებით ადევნო თვალი ყველა გამოყენებულ მეთოდს და შეახსენო შეცდომების შესახებ, იმისთვის რომ შენი დამსახურებით ჩემი ქმნილებები დროში უფრო მეტად სრულყოფილები გახდნენ. იმისთვის რომ ეს შეძლო მე გაძლევ შენ ცივი გონებით აზროვნების ნიჭს”

“შენ სასწორო გაძლევ მსახურების მისიას, იმისთვის რომ ადამიანებს ახსოვდეთ მოვალეობების შესახებ სხვა ადამიანების მიმართ, იმისთვის რომ მათ ისწავლონ თანამშრომლობა, განსხვავებული აზრის მიღება. მე ცხოვრებაში ბევრ უთანხმოებას გადაგყრით, იმისთვის რომ ისინი მოაგვაროთ, ამისთვის კი გაძლევთ სიყვარულის ნიჭს.”

“შენ მორიელო ძალიან რთულ დავალებას გაძლევ. შენ გექნება ადამიანების განზრახვის განჭვრეტის უნარი, მაგრამ მე არ გაძევ უფლებას ამის შესახებ მათ უთხრა. შენ მრავალჯერ მოგაყენებს ტკივილს ის რასაც ადამიანებში დაინახავ, ამ ტკივილის გამო შენ მე ზურგს მაქცევ და დაგავიწყდება რომ ეს ყველაფერი არა ჩემი, არამედ ჩემი იდეების არასწორად განვითარების გამო ხდება. შენ ადამიანებს იმდენად კარგად შეიცნობ, რომ მათში ცხოველს დაინახავ, საკუთარ თავში შეეცდები ამ ინსტინქტების ჩაკვლას და გზას აცდები. მაგრამ როდესაც გონს მოხვალ და დაბრუნდები ჩემთან, მე გაჩუქებ შენ უდიდეს ნიჭს, მიზანსწრაფულობას.”

“შენ მშვილდოსანო გაძევ დავალებას შეძლო ადამიანების გაცინება, რადგან ჩემი იდეების არასწორი განვითარების გამო ისინი სასტიკ არსებებად გადაიქცევიან. სიცილით შენ უნდა გააღვიძ მათში იმედი, იმედით კი შემოატრიალო ისინი ჩემკენ. შენ ცხოვრების მანძილზე ბევრ ადამიანს შეხვდები და თითოეულ მათგანში დატოვებ იმედის კვალს. შენ მშვილდოსანო მე გჩუქნი უსაზღვრო სიკეთის ნიჭს, იმისთვის რომ სამყაროს ყველაზე ბნელ კუთხესაც მიწვდე და შეძლო იქ სინათლის მიტანა”

“შენგან თხისრქა მე შრომას და ოფლის დაღვრას ვითხოვ, იმისთვის რომ შენი მაგალითით ადამიანებს შრომისმოყვარეობა ასწავლო. შენი მისია რთულია, რადგან შენს მხრებზე გადაივლის ადამიანების ძალისხმევა ვისაც კი ცხოვრების გზაზე შეხვდები და ამისთვის მე გაძლევ პასუხისმგებლობის ნიჭს”

“შენ მერწყულო, გაძლევ მომავლის იდეებს, იმისთვის რომ ადამიანებმა სხვა შესაძლებლობებიც დაინახონ. შენ დაგტანჯავს მარტოობის განცდა, რადგან მე არ გაძლევ ნებას ჩემი სიყვარული განასახიერო. მაგრამ იმისთვის რომ ადამიანების განსხვავებული შესაძლებლობები დაანახო, მე გაძლევ შენ თავისუფლების ნიჭს. შენი თავისუფლებით შენ უნდა ემსახურო კაცობრიობას”

“თქვენ თევზებო მე ყველაზე რთულ დავალებას გაძლევთ. მე გთხოვთ თქვენ შეაგროვოთ ადამიანების მწუხარება და დამიბრუნოთ ის მე. თქვენი ცრემლები უნდა იქცეს ჩემს ცრემლებად. მწუხარება, რომელიც თქვენ აგავსებთ, იქნება ადამიანების მიერ ჩემი იდეების არასწორად გაგების შედეგი. მაგრამ თქვენ უნდა შეგეძლოთ თანაგრძნობა, იმისთვის რომ ადამიანებმა შეძლონ ყველაფრის თავიდან დაწყება და შეცდომების გამოსწორება. ამიტომ მე გაძლევთ თქვენ ნიჭს ჩემი შეცნობის. თქვენ იქნებით ჩემი თორმეტი შვილიდან ერთადერთნი რომლებსაც ჩემი გაგება შეეძლებთ. მაგრამ ეს ნიჭი შეცნობისა, მხოლოდ თქვენთვისაა, რადგან როგორცკი შეეცდებით ის სხვა ადამიანებს გაუზიაროთ. თქვენ არ მოგისმენენ და უარგყოფენ.”

და მაშინ თქვა ღმერთმა

“ყოველი თქვენგანი ჩემი იდეის ნაწილის მატარებელია. თქვენ შეცდომით არ უნდა იღებდეთ მათ როგორც თქვენსას და არ უნდა შეეცადოთ ამ ნაწილების გაცვლას. რადგან ყოველი თქვენგანი დასრულებული და სრულყოფილია, მაგრამ თქვენ ამის შესახებ არ იცით და ვერც გაიგებთ სანამ არ გახდებით ერთი მთლიანი. და მაშინ ჩემი იდეის მთლიანობისა და სრულყოფილების საიდუმლოს შეიცნობთ”

და 12 შვილი წავიდა თავისი გზით, მაგრამ ბოლომდე საკუთარი დანიშნულების შესახებ ვერცერთმა გაიგო. ამიტომ ისინი მალევე დაბრუნდნენ ღმერთთან და მან უთხრა

“ყოველი თქვენგანი თვლის რომ სხვისი ნიჭი უკეთესია, ამიტომ მე მოგცემთ ნებას ისინი გაცვალოთ”

ერთი წამით თორმეტივე შვილი ბედნიერებამ და სიხარულმა აავსო, მათ დაუყოვნებლივ დაიწყეს ახალი მისიების შერჩევა და შეთანხმება ერთამენთში და მაშინ ღმერთმა უთხრა

“თქვენ არაერთხელ მობრუნდებით ჩემთან მისიის შესაცვლელად და მე თქვენ ყოველჯერზე მოგცემთ ნებას ეს გააკეთოთ. თქვენ გაივლით უთვალავ რეინკარნაციას, მანამ სანამ თავდაპირველ მისიას დაასრულებთ, რომელიც მე დაგიდგინეთ. მე გაძლევთ თქვენ განუზომელ დროს, მაგრამ მხოლოდ მაშინ დარჩებით ჩემთან როდესაც თქვენს საქმეს დაასრულებთ.”

ფორტუნის პარსი პირად რუკაში

დატოვე კომენტარი

როგორ უნდა ვიანგარიშოთ ფორტუნა რომელ ნიშანშია

ასცენდენტს+მზე-მთვარე
ასცენდენტს+მთვარე-მზე

ზოგადად ფორტუნა მიუთითებს არა იმაზე რომ რაღაც კონკრეტულში აქვს ადამიანს იღბალი და შეუძლებელია სხვაში ქონდეს. არა! ეს შესაძლებლობებს გვანახებს ისევე როგორც ყველაფერი სხვა ასტროლოგიაში.

ფორტუნა მიუთითებს იმ შესაძლებლობაზე რომელიც ადამიანს ზედმეტი ძალისხმევითაც აქვს, რაშიც ზედმეტი ძალისხმევითაც აღწევს წარმატებას, რაც თავისთავად გამოსდის. თუმცა ეს არ ნიშნავს რომ თუ ადამიანს განსხვავებული ინტერესები და მიზნები აქვს, თუ მას რთული გზის არჩევა ურჩევნია სხვა თვისებების განვითარება ყოველთვის შეიძლება.

აქ საუბარია შესაძლებლობებზე, მიზნებსა და თვისებებზე რომელთათვისაც ადამიანმა ზედმეტი ძალისხმევა შეუძლია არ დახარჯოს, იმიტომ რომ ის ისედაც მარტივად გამოუვა. რაც ასევე არ ნიშნავს რომ არაფერი არ უნდა გააკეთოს )))))

ახლა ფორტუნა სტიქიების მიხედვით ძალიან მოკლედ.

ფორტუნა ცეცხლის ნიშნებში

ცეცხლოვანი ფორტუნა გულუხვი და იმპულსურია საკუთარ ღირებულებებთან მიმართებაში. ის ადვილად შოულობს ფულს და ასევე ადვილად ხარჯავს.

ფორტუნა მიწის ნიშნებში

ეს ადამიანი ზუსტად განსაზღვრულ გეგმას მიყვება, აქვს დასახული კონკრეტული გრძელვადიანი მიზნები და მას არ უხვევს, არის სტაბილური, განსაკუთრებული სწრაფი და შესამჩნევი ცვლილებების გარეშე, რისი წყალობითაც აღწევს დასახულ მიზნებს.

ფორტუნა ჰაერის ნიშნებში

მატერიალურად ყოველთვის უზრუნველყოფილია, ფული თავისით მოდის, ადვილად შოულობს და სიამოვნებითაც ხარჯავს, მაგრამ არასდროს უთავდება. უნდა ერიდოს სიხარბეს, ამ ადამიანის იღბალი სანაცნობო წრეშია.

ფორტუნა წყლის ნიშნებში

ყველაზე მაღალი რისკია ფინანსური მდგომარეობისთვის ფორტუნის ასეთი მდებარეობა. ფული მათთან უკვალოდ ქრება. მიუხედავად იმისა რომ წყლის ფორტუნას ფულის დაგროვება უყვარს, მას ან იპარავენ, ან უფასურდება ან რაიმე სხვა მიზეზით.

ძალიან მოკლედ ფორტუნა ნიშნებში

ფორტუნა ვერძში

ამ ადამიანმა უნდა ისწავლოს იმპულსური ხასიათის ჩახშობა და საკუთარი შესაძლებლობები აღიქვას ადეკვატურად, გაითვალისწინოს საკუთარი გამოცდილება და ისე მოკიდოს საქმეს ხელი. შეიძება ბევრი აიღოს თავის თავზე და იმედგაცრუება დაეუფლოს, იღბალს იპოვნის ნებისმიერ საქმეში და თუ უფრო მეტად დაფიქრდება სანამ საქმეს დაიწყებს, არ აჩქარდება და საკუთარ შესაძლებლობებს ადეკვატურად შეაფასებს შემდეგ უკვე შეუძლია ენდოს ინტუიციას, რომელიც როგორც აღმოაჩენს თითქმის არასდროს ღალატობს.

ცნობილი ადამიანები ვერძი ფორტუნით: ჯორჯ ვაშინგტონი, ისააკ ნიუტონი, ალბერტ აინშტაინი.

ფორტუნა კუროში 

ისევე როგორც ვერძს კუროსაც ახასიათებს აჩქარება, მაგრამ ის მეტად სტაბილურია და კიდევ უფრო ჯიუტი. ასეთი ფორტუნა იღბლიანია თუ სოციალურ სამუშაოს მოკიდებს ხელს, ის იღბალს და კმაყოფილებას მოიპოვებს თუ ჭეშმარიტად სასიკეთო საქმეს მოკიდებს ხელს, არა ერთი და ორი ადამიანებისთვის არამედ ბევრად მეტი, მაგალითად თუ შექმნის ფონდს და ა.შ. ის აუცილებლად იპოვნის იღბალს, მას ექნება შემოსავალი რომელიც კუროს დააკმაყოფილებს და უფრო მეტიც და ის შინაგან კმაყოფილებასაც იგრძნობს

ცნობილი ადამიანები კურო ფორტუნით: მარტინ ლუთერი, გოეთე, ბეჯამინ ფრანკლინი, ბისმარკი, ტროცკი. 

ფორტუნა ტყუპებში

სხარტი აზროვნება, ადვილად სწავლობს. მისი იღბალი მდგომარეობს იმაში რომ შეუძია ქუჩაში გაჩერდეს უცხო ადამიანს გამოელაპარაკოს და ის აღმოჩნდეს ზუსტად ის ადამიანი, ვინც მას ყველაზე მეტად ჭირდება ამ კონკრეტულ მომენტში. ფორტუნა ტყუპების განვითარება ყველაზე უკეთ ფილოსოფიურ საქმიანობაში ხდება, როგორც მინიმუმ ეს მისი ინტერესის სფერო უნდა იყოს. იღბალს კარგავს როცა ის საქმიანობაში საკუთარ შესაძლებლობების რეალიზებას ვერ ახდენს.

ცნობილი ადამიანები ტყუპი ფორტუნით: დედოფალი, ვიქტორია, რუდოლფ შტაინერი, ჩე გევერა, სალვადორ დალი

ფორტუნა კირჩხიბში

ეს ადამიანი ბედნიერებს სახლში და სამშობლოში აღწევს, მისი საქმიანობაც მაქსიმალურად სამშობლოს უნდა უკავშირდებოდეს ან სახლს. ძალიან ადვილია ამ სფეროში და საკუთარ ქვეყანაში წარმატების მოპოვება. იმისთვის რომ იღბალი არ დაკარგოს უნდა დაიცვას ტრადიციები და ემსახუროს სამშობლოს.

ცნობილი ადამიანები კირჩხიბი ფორტუნით: კარლ მარქსი, ნიკოლოზ მეორე, ადოლფ ჰიტლერი, ამერიკის შეერთებული შტატებისა და დიდი ბრიტანეთის ქვეყნები.

ფორტუნა ლომში

იმისთვის რომ ლომმა ბედნიერება მოიპოვოს საჭიროა საკუთარი ემოციების პროექცია მოახდინოს ყველაფერზე რასაც ხედავს ან ეხება მისი ბედნიერება იქნება სრულყოფილი როცა ის იქნება კოლექტიური, ამიტომ მისი საქმიანობა უნდა უკავშირდებოდეს სხვა ადამიანების ემოციების გაზიარებას, სიამოვნების მოტანას, მათ დახმარებას, მათ უკეთესად ქცევას ან გაბედნიერებას.

ცნობილი ადამიანები ლომი ფორტუნით: ოლივერ კრომველი, ზიგმუნდ ფროიდი, ლენინი, ვიქტორ ჰიუგო

ფორტუნა ქალწულში

ქალწული ცდილობს ყველაფერი გაანალიზოს და კრიტიკულად შეხედოს, მისთვის წარმატებული ის სფეროებია ის გარემო სადაც მას შესაძლებლობა ექნება კრიტიკული სიტუაციები სწრაფად გადაწყვიტოს. სადაც საჭირო იქნება გადაწყვეტილების მიღება სწრაფად, უემოციოდ და გააზრებულად. თუმცა ის სრულყოფილად მხოლოდ მას შემდეგ მოიპოვებს ბედნიერებას, როდესაც ისწავლის გარშემომყოფების ნდობას.

ცნობილი ადამიანები ქალწული ფორტუნით: მახათმა განდი, ბენიტო მუსოლინი, ჟაკ ბემე

ფორტუნა სასწორში

ასეთი ფორტუნა ბედნიერებას და იღბალს მხოლოდ პირადი ურთიერთობების მოწესრიგების შემდეგ მოიპოვებს, პარტნიორებთან ურთიერთობები უჭირს, რადგან მას აქვს იდეალები, რომლებსაც ეძებს ახალ პარტნიორებში და ძალიან მალე ემსხვრევა, ასევე ასეთი ფორტუნა ცდილობს საკუთარი ინდივიდუალური თვისებები ნაწილობრივ მაინც დათრგუნოს და სოციუმისთვის სასურველი ჩარჩოებში მოექცეს რაც მას იღბალს აკარგვინებს. მან უნდა ისწავლოს საკუთარი ინდივიდუალიზმის გამოვლენა და ადამიანების ისეთებად აღქმა როგორებიც ისინი არიან სინამდვილეში, მხოლოდ მას შემდეგ შეძლებს კარიერაში წარმატებას მიაღწიოს რაც პირად ცხოვრებაში გააკეთებს ამას.

ცნობილი ადამიანები სასწორი ფორტუნით: კარლა ბრუნი, ოპრა უინფრი, იოსებ სტალინი, ალფრედ ჰიჩკოკი.

ფორტუნა მორიელში

მორიელი ფორუნა დიდ ენერგიას ფლობს შესაძლოა ამაში სექსუალური ენერგიაც ვიგულისხმოთ, ასეთი ფორტუნით პირად რუკაში ადამიანი ბევრ სირთულეს ხვდება, მაგრამ მას შემდეგ რაც ხდება შემოქმედი, იქნება ეს ისეთი ქმნილება რომელიც თაობებს დარჩება ან თუნდა მარტივად შვილი ადამიანის ცხოვრება უფრო მარტივი ხდება და მიზნებსაც წარმატებით აღწევს.

ცნობილი ადამიანები მორიელი ფორტუნით: ბრედ პიტი, ვოლფგანგ ამადეუს მოცარტი, ჯორჯ ბუში, ქალწული მარიამი

ფორტუნა მშვილდოსანში

ასეთი ადამიანი იღბალს იპოვნის სოციუმში და არა საკუთარ თავში, მან ფორტუნა უნდა ეძებოს სახლიდან მოშორებით, შესაძლოა სხვა ქვეყანაშიც, შესაძლოა აქ იგულისხმებოდეს მაგალითად განსხვავებული პროფესიის არჩევა თუ ოჯახის წევრებს და წინაპრებს რაღაც საერთო პროფესია ქონდათ და ა.შ. ასევე ამ ადამიანმა უნდა ისწავლოს გარემოს კვლევა, დაკვირვება ადამიანებზე და მათგან სწავლა. ეს ის შემთხვევაა როცა სხვის შეცდომებზე ნამდვილად სწავლობენ.

ცნობილი ადამიანები მშვილდი ფორტუნით: ფრედი მერკური, უილიამ შექსპირი, ბოდლერი, მიქელანჯელო.

ფორტუნა თხისრქაში

ადამიანი იღბალს იპოვნის არა სოციუმში არამედ საკუთარ თავში ჩაღრმავებით, ფასეულობებზე და ღირებულებებზე უნდა იფიქროს და უნდა მიყვეს იმ ხაზს რომელიც დაუტოვეს წინაპრებმა, მისი იღბალი ტრადიციებშია რომელიც თაობებს მოსდევდა, ხოლო მაქსიმალურ ბედნიერებას მიაღწევს მაშინ, როდესაც ამ ყველაფერთან ერთად შეძლებს საკუთარი ინდივიდუალიზმის გამოვლენას.

ცნობილი ადამიანები თხირქა ფორტუნით: ჯონ კენედი, პრინცი უილიამი, სადამ ჰუსეინი, პრინცი ჩარლზი, უინსტონ ჩერჩილი, ენდერს ბრეივიკი

ფორტუნა მერწყულში

რეფორმატურული თვისებები რომელსაც მერწყულის ნიშანი ატარებს გასათვალისწინებელია, ეს ადამიანი ფორტუნას იპოვნის, მისთვის მეტად ადვილი იქნება რაიმე ახლის გამოგონება ვიდრე ძველის შესწავლა, მისთვის ადვილი იქნება გამოიგონოს ველოსიპედი თავიდან ვიდრე ისწვლოს მასზე ჯდომა. ამაზე უნდა დაფიქრდეს, თუ შეძლებს ამ ორი ფაქტორის სინთეზი მოახდინოს და საკუთარი შესაძლებლობები უფრო პროდუქტიულად გამოიყენოს ნამდვილად მიაღწევს წარმატებას.

ცნობილი ადამიანები მერწყული ფორტუნით: ჩარლზ დე გოლი, იოჰან სებასტიან ბახი, ლედი გაგა, დონალდ ტრამპი, ნიკოლა ტესლა

ფორტუნა თევზებში

ერთის მხრივ ეს გენერლების ფორტუნაა მეორეს მხრივ მუსიკოსების, ზოგადად ეს ფორტუნა ყველაფერი კოლექტიურის მსხვრევას მგანასახიარებს, როდესაც ძველი და დრომოჭმული თვითლუსტრაციას ეწევა იმისთვის რომ ადგილი დაუთმოს ახალს და პროგრესულს. ასეთი ადამიანები ხშირად გარდაიქმნებიან, მათ საკუთარ შეცდომებზე უწევთ სწავლა და მხოლოდ გარდაქმნით მიაღწევენ წარმატებას როდესაც მოხდება ღირებულებების გადაფასება მათტვის ყველაფერი მეტად ადვილი და ხელმისაწვდომი გახდება.

ცნობილი ადამიანები თევზები ფორტუნით: ჟაკ შირაკი, ჟიულ ვერნი, აბრაჰამ ლინკოლნი, ტონი ბლერი, მადონა

კაბალისტური ასტროლოგია

2 Comments

კაბალა არის მეცნიერება, რომელიც აკრძალულიც იყო, დაფარულიც და ამავე დროს შეუძლებელია მისი დაფარვა, მისი სწავლება ან ამ ცოდნის გადმოცემა.

კაბალა გულისხმობს ცოდნას, რომელიც კაცობრიობას, განურჩევლად ეპოქისა, ადამიანების, ქვეყნების და ა.შ. მიეცათ, ანუ ცოდნას რომელსაც ჩვენ ვფლობთ მაგრამ შესაძლოა ბოლომდე ვერ ვაცნობიერებდეთ. ზოგადად კაბალა არის ბედისწერის მართვის მეცნიერება.

კაბალისტს როგორც წესი ორივე რეალური სამყაროსა და ზესამყაროს ხედვის უნარი აქვს და ის აღწერს ზესამყაროს, რეალური სამყაროსთვის გასაგები ენით. თვითონ კაბალისტები ეწინააღმდეგებოდნენ იმას რომ კაბალა ყოფილიყო დაშვებული, ღია მეცნიერება და მხოლოდ მეოცე საუკუნის 90-იანები წლებიდან გახსენს ის, რადგან როგორც მიხაილ ლეიტმანი ამბობს ადამიანებმა შეწყვიტეს პრიმიტულად აზროვნება და ზეარსებების წარმოდგენა, ქალთევზების, კენტავრების, ანგელოზების და ეშმაკების სახით. მათ ღმერთი და ზესამყარო ენერგიისა და ენერგოველების აღქმასთან დააკავშირეს. ანუ სხვა ეტაპზე გადავიდნენ ადამიანები რის გამოც კაბალისტებმა ჩათვალეს რომ სამყარო მზად იყო ამ მეცნიერების სწორად მისაღებად და გახსნეს ის.

კაბალაში მთავარი კითხვა არის რატომ ვარსებობთ? ზოგადად ფსიქოლოგები თვლიან რომ ეს გარდატეხის, მოზარდობის ასაკისთვის დამახასიათებელი კითხვაა და ადამიანი რომ იზრდება ამ კითხვაზე მისთვის სასურველ პასუხს პოულობს. თუმცა თაობები ისე მიდიოდნენ რომ მათგან მხოლოდ რჩეულებს შეეძლოთ ამ კითხვაზე პასუხის გაცემა. კაბალისტების აზრით, კაბალას სინამდვილეში ის ჩაწვდება, ვინც ზრდასრულ ასაკშიც კი “იტანჯება” შეკითხვით “რატომ ვარსებობთ?”

კაბალა ცივილიზაციის მამოძრავებლად სურვილს მიიჩნევს. ითვლება რომ ადამიანების სურვილები იცვლებოდა საუკუნეების და ათასწლეულების მანძილზე, რაც დრო გადიოდა მით დიდი იყო სურვილები და მით უფრო არარეალურიც კი, მაგრამ ეს იყო მიზეზი რაც კაცობრიობას წინსვლის საშუალებას აძლევდა.

კაბალა კაცობრიობის სურვილებს 5 ეტაპად ყოფს

პირველყოფილი სურვილი – სექსი და ჭამა
მეორე ეტაპის სურვილი – იყო მდიდარი
მესამე ეტაპის სურვილი – გქონდეს ძალაუფლება
მეოთხე ეტაპის სურვილი – გქონდეს ცოდნა
მეხუთე ეტაპის სურვილი – განვითარდე სულიერად, იყო შემოქმედი

კაბალა ამ უკანასკნელ სურვილს ადამიანის სულს ეძახის. კაბალა ასევე იკვლევს სულის კონსტრუქციას, რისგან შედგება ის, ამ ეტაპზე კაბალის სწავლებაში არის სულის 600 000 ნაწილი, რომელიც ყველა ადამიანშია.

კაბალისტური ასტროლოგია მოიცავს ზესხეულებს, ნიშნებს, პლანეტებს, დიალქეტებსა და სახლებს. დავიწყებ ნიშნებიდან

კაბალისტურ ასტროლოგიაში, ასტროლოგიური ნიშნები წარმოადგენენ ადამიანის ორგანიზმის ენერგო-ინფორმაციული ნაკადების ცვლის ძირითად არხებს. ისინი 7 ზესხეულისგან შედგება, რომლებიც გადაიკვეთებიან ნიშნებით.

პირველი 6 ნიშანი განასახიერებს დაღმავალ არხებს:

ვერძი – ატმანურიდან ბუდხალურისკენ
კურო – ბუდხალურიდან კაზუალურისკენ
ტყუპები – კაზუალურიდან მენტალურისკენ
კირჩხიბი – მენტალურიდან ასტრალურისკენ
ლომი – ასტრალურიდან ეთერულისკენ
ქალწული – ეთერულიდან ფიზიკურისკენ

მომდევნო 6 ნიშანი განასახიერებს აღმავალ არხებს:

სასწორი – ფიზიკურიდან ეთერულისკენ
მორიელი – ეთერულიდან ასტრალურისკენ
მშვილდოსანი – ასტრალურიდან მენტალურისკენ
თხის რქა – მენტალურიდან კაზუალურისკენ
მერწყული – კაზუალურიდან ბუდხიალურისკენ
თევზები – ბუდხიალურიდან ატმანურისკენ


ესეც ალქიმიური სქემა ზესხეულებისა და ადამიანის ორგანიზმის ძირითადი ნაკადების შესახებ

ადამიანის ორგანიზმსა და ზესხეულებს შორის რომ გავავლოთ პარალელები დაახლოებით ასეთ სურათს მივიღებთ
უმაღლესი სხეული (სული) – ატმანური და ბუდხალური სხეული
დამაკავშირებელი სხეული (სოციალური) – კაზუალური, მენტალური, ასტრალური სხეული
მყარი სხეული – ეთერული და ფიზიკური სხეული

შემდეგ ასევე სხეულების ევოლუციის ფაზებსაც განვიხილავ და უფრო დეტალურადაც თითოეულ მათგანს, მაგრამ ახლა წარმოდგენისთვის თითო წინადადებით შემოვიფარგლები.

ატმანური სხეული – ყველაზე ზედა სხეულია ზესხეულებიდან, ჩვეულებრივი გონებისთვის ის საოცრად დელიკატურია, მისი გააზრება რაციონალური აზროვნებისთვს თითქმის შეუძლებელია. ის მოიცავს ინფორმაციას, უფრო სწორად კი ადამიანის მისიის შესახებ ინფორმაციას, ასევე მისი ბედისწერის მონახაზის შესახებ ინფორმაციას რომლის ფარგლებშიც იქნება შესაძლებელი სწორედ ამ მისიის განხორციელება.

ბუდხალური სხეული – მასში ადამიანის როგორც შინაგანი სამყაროს, ასევე იმ გარემოს შესახებ რომელშიც ის არსებობს მხოლოდ ძირითადი ინფორმაციაა ჩადებული, კონკრეტიკისა და დეტალების გარეშე.

კაზუალური სხეული – ძირითადი ცნებები, რომელიც ამ სხეულს უკავშირდება არია: მოვლენა, მოქმედება, შედეგი. პირველი ადამიანის პასიურობას განასახიერებს, მეორე აქტივობას (ბუდხალური და ატმანური) და ორივე ერთად ე.წ. ადამიანის სულს შეადგენს. კაზუალური კი მიწაზე დაშვებას გავს, ზე სხეულები და ქვესხეულები ერთმანეთისგან ვიბრაციებით განსხვავდებიან. ქვემოთ სვლისას სხეული უფრო და უფრო ქვესხეულად წარმოგვიდგება. კაზუალური სხეული ადამიანის ღირებულებების და იდეალების შესახებ ინფორმაციას წარმოადგენს.

მენტალური სხეული – ის სამ ზესხეულსა და სამ ქვესხეულს შორისაა, გარდამავალია. ამიტომ მას საკუთარი “ინდივიდუალური” მნიშვნელობის გარდა ადამიანის ორგანიზმში განსაკუთრებული კომუნიკაციური თავისებურებები შემოაქვს, რომელიც ამ „შვიდართულიანი სახლის“ სამ ზედა და სამ ქვედა სართულს ერთმანეთთან აკავშირებს. ეს სხეული ფლობს ინფორმაციას სამყაროსა და ევოლუციის შესახებ, განასახიერებს ადამიანის გონს, როგორც ევოლუციის უმაღლეს საფეხურს.

ასტრალური სხეული – ის განასახიერებს ემოციებს, ინსტინქტებს, შეგრძნებებს, ფლობს ინფორმაციას პირველყოფილობის შესახებ და ის უფრო მეტად გამოხატულია ადამიანებში, ასოციალურებსა და დაბალი თვითშეფასების მქონეებში, ანუ ადამიანებში დაბალი განვითარებით და ექვემდებარება ეთერულ სხეულს.

ეთერული სხეული – ის ფიზიკური სხეულის შედეგია, ფიზიკურად ენერგეტიკული ველი მასებით იქმნება. ის განასახიერებს ადამიანი იმუნიტეტის და ზოგადად ფიზიკური სხეულის შესაძლებლობებს, ჯანმრთელობა, სასიცოცხლო ენერგიას.

ფიზიკური სხეული – ის ძალიან ახლოს დგას კაზუალურთან, ის ატარებს ინფორმაციას ყველა იმ სხეულის შესახებ, რომელიც ფიზიკურად არსებობდა, ასევე ძლიერი ცოდნა სიმბოლოების, კაზუალურთან პარალელი ეს ძლიერ ეგრეგორთან კავშირივითაა ამ შემთხვევაში, რომელიც მის გარშემო მოვლენების განვითარებას ზედმიწევნით აკონტროლებს. ფიზიკური სხეული ქვესხეულებს შორის უკანასკნელია, ყველაზე „მყარი“.

ინდური სიბრძნე არსებობს, რომ ყველაფერს რასაც ადამიანი ხედავს მაიაა, ილუზია, მაგრამ მანამ სანამ ადამიანის თვალთახედვა მჭიდროდაა დაკავშირებული მის ქვესხეულებთან, ამის დაჯერება შეუძლებელია.

თვითონ სიტყვა ებრაული წარმოშობისაა lekabel აქედან მოდის რაც ნიშნავს მიღებას. კაბალა ეხმარება ადამიანს იმუშაოს იმაზე თუ როგორ უნდა მოიპოვოს ადამიანმა სიმშვიდე, როგორ მიიღოს ის სამყაროს შემქმნელისგან, როგორ მოიპოვოს უკვდავება და კმაყოფილება. რაც მთავარია კაბალა არ უკავშირდება რელიგიას, ის მეცნიერებაა. კაბალა სწავლოს ასე ვთქვათ პარამეცნიერებების ფიზიკას. ის არ არის კავშირში არც რელიგიასთან და არც იუდაიზმთან. ეს არის მეთოდი თუ როგორ უნდა “შევასწოროთ” სული, კაბალა არ გავალდებულებს დაიცვა რაიმე რიტუალი, არ გზღუდავს და არ გაკისრებს რაიმე პასუხისმგებლობას.

რაც შეეხება კაბალისტურ ასტროლოგიას, ის უბრალოდ სრულყოფს იმ წარმოდგენას რასაც ჩვენ ტრადიციული ასტროლოგია გვაძლევს. სამყაროში ყველაფერს რაც არსებობს ან “არარსებობს” აქვს ენერგია რომელიც მოქმედებს ყველაფერზე რაც არსებობს ან “არარსებობს”. იმის თქმა მინდა რომ თუ პლანეტას შეუძლია ენერგიით იმოქმედოს ადამიანზე მხოლოდ იმიტომ რომ ის ხილულია, არ ნიშნავს რომ ის რაც ჩვენთვის უხილავია არ მოქმედებს ჩვენზე. ის შრეები სამყაროს რომელიც ჩვენს გარშემოა და ჩვენშია ამოტრიალებული.

ტატუები და ასტროლოგია

%(count)s კომენტარი

ამ პოსტზე ბევრს ვფიქრობდი, იმიტომ არა რომ ბევრია რამე საფიქრალი, უბრალოდ მეზარებოდასავით დაწერა და სულ იქით ვდებდი რატომღაც. ეს პოსტი ეხება სიმბოლოებს ჩვენს კანზე ანუ ტატუებს და მათ მნიშნელობას ჩვენს ცხოვრებაში. მოკლედ ჰაგის ახალი პოსტი ტატუებზე და ასტროლოგიზე.

ძალიან მომწონს ტატუ, ზოგადად სხეულის გალამაზება და დამატებითი ენერგეტიკა, არხი თუ უბრალოდ ბევრისთვის სამკაული, როდესაც კარგადაა შესრულებული უდაოდ მიმზიდველია. ნუ არიან ადამიანები ვისაც არ იზიდავს ტაუტები, მაგრამ ეს პოსტი მათთვის არაა 🙂 ეს პოსტი არის იმაზე, გაცნობიერებულად თუ გაუცნობიერებლად რა არხებს ვხსნით, რა ენერგიას ვიღებთ და უბრალოდ რა იცვლება იმით, რომ თუნდაც ერთ დამატებით წერტილს ვისვამთ სხეულზე. მთავარი არის სამი რამ: ერთი – სად ვიკეთებთ ტატუს, მეორე – რას ვიკეთებთ და მესამე – რაც ასტროლოგიას არ ეხება, მაგრამ არანაკლებ მნიშვნელოვანია ვინ გვახატავს მას 🙂 ამ პოსტში პირველ ორზე იქნება საუბარი.

ძალიან რომ არ დაიბნეთ დავიწყებ მარტივად. მგონი ყველამ იცის თავისი ასტროლოგიური ნიშანი ამიტომ პირდაპირ დავწერ რომელი ნიშანი სხეულის რა ნაწილის და რა ორგანოს მმართველია.

ვერძი – თავი, სახე და ტვინი

კურო – კისერი, ყურები, ხორხი და იოგები

ტყუპები – მკლავები, მხრები, კუნთები, ფილტვები და ბრონქები

კირჩხიბი – მუცელი, მკერდი, დიაფრაგმა, ღვიძლის ზედა ნაწილი

ლომი – გული, ხერხემალი და მალები

ქალწული – კუჭ-ნაწლავი, საჭმლის მომნელებელი სისტემა და ღვიძლის ქვედა ნაწილი

სასწორი – თირკმელი, წელი და კანი

მორიელი – სასქესო ორგანო, შარდის ბუშტი, ნაღვლის ბუშტი, სწორი ნაწლავი, რეპროდუქციული სისტემა.

მშვილდოსანი – თეძოები და ნერვული დაბოლოებები.

თხისრქა – მუხლები, სახსრები და თმები

მერწყული  – ძვლები, კბილები და სისხლი

თევზები – ტერფები და თითები

რას ნიშნავს ეს ყველაფერი, მაგალითად მე ვარ თევზები და ჩემი სუსტი წერტილია ტერფები და თითები. მე შემიძლია ავირჩიო სიმბოლო რომელიც პირადი რუკიდან გამომდინარე გააძლიერებს ამ ენერგეტიკას ან შეიძლება ისეც მოხდეს, არასწორად არჩევის შემთხვევაში, რომ ძალიან ცუდად ჩავერიო, მაგრამ სანამ აქამდე მივალთ კიდევ ერთს შემოგაპარებთ. ყველა ნიშანს ყავს თავისი მმართველი პლანეტა, ხოლო ყველა პლანეტას აქვს გავლენა კონკრეტულ ორგანოზე. მაგალითად:

მარსი მართავს ვერძს და მორიელს, ხოლო გავლენა აქვს არტერიებზე, კუნთებზე, თმებსა და ფრჩხილებზე.

ვენერა მართავს კუროს და სასწორს, ხოლო გავლენა აქვს თირკმელზე და საჭმლისმომნელებელ სისტემაზე.

ვენერა და მარსი ერთად განაგებენ რეპროდუქციულ სისტემას.

მერკური მართავს ტყუპებს და ქალწულს, ხოლო გავლენა აქვს რესპირატორულ სისტემაზე.

ნეპტუნი მართავს თევზებს, ურანი მერწყულს. ურანსა და ნეპტუნს ერთობლივად აქვს გავლენა ენდოკრინულ სისტემაზე.

მერკურსა და ურანს კი ერთობლივად აქვთ გავლენა ტვინსა და ნერვულ სისტემაზე.

მერწყულს ურანთან ერთად მართავს სატურნიც, ხოლო თხის რქას ასე ვთქვათ დამოუკიდებლად. სატურნს გავლენა აქვს ვენებზე, კანზე, ძვლებსა და ჩონჩხის აგებულებაზე.

ასევე მორიელს მარსთან ერთად მართავს პლუტონიც, პლუტონს გავლენა აქვს სათესლე ჯირკვლებზე.

იუპიტერი ნეპტუნთან ერთად მართავს თევზებს ხოლო დამოუკიდებლად მშვილდოსანს, იუპიტერს გავლენა აქვს ღვიძლზე.

კირჩხიბს მართავს მთვარე, ხოლო გავლენა აქვს საკვერცხეებზე.

მზე კი მართავს ლომს და გავლენა აქვს გულზე.

ახლა დავლაგდეთ. შევეცდები ავხსნა მარტივად, რადგან სინამდვილეში ასეცაა. მოკლედ როგორც ვიცით უამრავი თანავარსკლავედი არსებობს ცაზე, მათ შორისაა 12 ასტროლოგიური ნიშნის თანავარსკლავედიც, რომელიც ფიზიკურად არსებობს. მზე ერთი ნიშნის გავლას 1 თვე უნდება დაახლოებით, სწორედ ამიტომაა, რომ თუ თქვენ დაიბადეთ 20 ოქტომბრისა და 20 ნოემბრის შუალედში მორიელი ხართ, ანუ მზე იყო მორიელის თანავარსკვლავედში, თუ მაგალითად 20 აპრილიდან 20 მაისამდე ე.ი. კურო ხართ და ა.შ. ეს კი ნიშნავს იმას, რომ თქვენ ასე ვთქვათ მზით ხართ მორიელი ან კურო იმის მიხედვით თუ მზე რომელ თანავასკვლავედს გადიოდა.

ახლა რა ხდება ხოლმე პირადი რუკის შედგენისას, საქმე იმაშია რომ თქვენი დაბადების მომენტში ყველა პლანეტას, ასტეროიდსა და მზეს ასევე, როგორც მთვარეს კონკრეტული მდებარეობა ქონდა, უნიკალური (გრადუსების გათვალისწინებით) შესაბამისად თქვენი პლანეტები შესაძლოა სხვადასხვა ნიშნებში იყოს გაფანტული. უფრო მარტივად თქვენი დაბადების მომენტში ისინი სხვადასხვა თანავარსკვლავედს გადიოდნენ. სწორედ ეს ხდის ადამიანს უნიკალურს და ანგრევს მითს “მე წავიკითხე ჩემი ნიშნის დახასიათება და საერთოდ არ დაემთხვა”. შესაძლოა თქვენ სხვა ნიშნის გავლენა უფრო მეტად გაქვთ, ამას დავამატოთ თქვენს რუკაში პლანეტების ურთიერთმიმართება ანუ ასპექტები და სახლები, თუმცა შორს არ წავალ.

დავუბრუნდეთ ტატუებს, რატომ იყო ეს ყველაფერი სათქმელი და მნიშვნელოვანი. იმიტომ რომ შესაძლოა თქვენ მთვარე გყავთ მაგალითად მორიელში, მორიელს მართავს მარსი, ამ შემთხვევაში მორიელი, მთვარის და მარსის მდებარეობებია მნიშვნელოვანი და ასე ყველა სხვა პლანეტაზე 🙂 საბოლოოდ ვიღებთ ობობის ქსელის რაღაც მსგავს ნახაზს, რომელსაც თქვენი პირადი ასტროლოგიური რუკა ქვია და რომელიც მნიშნელოვანია იმისთვის, რომ როცა რამეს იხატავ კანზე, სხეულის კონკრეტულ ადგილზე, ბედს არ ენდო და იცოდე რას შეცვლის ეს შენს ცხოვრებაში, რადგან ჩვენ ადამიანები კანს არ ვიცვლით.

იმისთვის რომ უფრო ცხადი იყოს რა საშიშროება შეიძლება იყოს, უბრალოდ ჩამოვწერ თუ რომელ ნიშანს რა დაავადებები ახასიათებს.

ვერძი: თავის და თვალის ტკივილი, ციება, უბედური შემთხვევები

კურო: ძირითადად ყელის ტკვილი და რაც მას უკავშირდება.

ტყუპები: ბრონქებთან დაკავშირებული დაავადებები, პლევრიტი და პნევმონია, ბრონქიალური ასთმა და ანემია.

კირჩხიბი: საჭმლის მომნელებელი სისტემის დაავადებები.

ლომი: გულ-სისხლძარღვთა დაავადებები და სისხლის მიმოქცევასთან დაკავშირებული პრობლემები.

ქალწული: კუჭ-ნაწლავთან დაკავშირებული პრობლემები.

სასწორი: თირკმელებთან და ხერხემალთან დაკავშირებული დაავადებები.

მორიელი: ვენერიული დაავადებები.

მშვილდოსანი: რევმატიზმი ან სახსრების სხვა დაავადებები.

თხისრქა: ძირითადად კანთან დაკავშირებული პრობლემები.

მერწყული: ვენების ვარიკოზული დაავადებები, ავარიები და ზოგი ნერვული დაავადება.

თევზები: გაციება და ჰაერწვეთოვანი ვირუსები.

რაც მთავარია და აუცილებლად გასათვალისწინებელი, ის თუ რომელია თქვენი ნიშანი არ განსაზღვრავს ზემოთჩამოთვლილი დაავადებების მიმართ მიდრეკილებას, ეს შეიძლება იყოს მკვეთრად გამოხატული რამდენიმე ან სულაც განსაკუთრებით არცერთი, რადგან ეს დამოკიდებულია არა მხოლოდ თქვენს მზეზე, არამედ სრულად პირად რუკაზე.

პ.ს. იმედი მაქვს სასარგებლო და დამაფიქრებელი ინფორმაცია მიიღეთ, მათთვის კი ვისაც არ ჯერა ამ ყველაფრის იმედია პოსტით იხალისეთ, თუ ჩაიკითხეთ რათქმა უნდა 🙂

სიყვარულით თქვენი ჰაგი

ასტროლოგიური ნიშანი – რეალური არსება – ზებუნებრივი არსება

დატოვე კომენტარი

მოკლედ ერთ-ერთი ძალიან საინტერესო წიგნის კითხივსას, საიდანაც ეჭვი მაქვს კიდევ დავწერ რაღაცეებს. გადავაწყდი ძალიან საინტერესო ცხრილს. ეს არის ასტროლოგიური ნიშნების შესატყვისი რეალური არსებები და ზებუნებრივი არსებები. უბრალოდ ჩამოვწერ და გავერთოთ 🙂

ამ თანმიმდევრობით დავწერ

ასტროლოგიური ნიშანი – რეალური არსება – ზებუნებრივი არსება

ვერძი – ცხვარი – ერინიები
კურო – ხარი – მინოტავრი
ტყუპები – ძაღლი – ბანში
კირჩხიბი – კირჩხიბი, კუ, გველი – ვამპირი
ლომი – ლომი, კატა, ვეფხვი – დრაკონი
ქალწული – ნებისმიერი სუფთა ჯიშის ცხოველი – ქალთევზა
სასწორი – სპილო – ფერია
მორიელი – მორიელი, ობობა – ლამია
მშვილდოსანი – ცხენი – კენტავრი
თხის რქა – თხა – სატირი
მერწყული – ადამიანი – სირენა
თევზები – თევზები, ხოჭო – მაქცია

საინტერესო და უჩვეულო განმარტებები რომ არის და მსგავსს რომ ვერსად სხვაგან ვერ ნახავთ ამიტომაც შემოგთავაზეთ გასართობად 🙂

რატომ მქვია HAG

%(count)s კომენტარი

მას შემდეგ რაც უკვე 10 წელია ვატარებ სახელს HAG უამრავ ადამიანს უკითხას რას ნიშნავს ეს სიტყვა, არცერთს არ უკითხავს მიზეზი რატომ ჰაგ, რატომ ალქაჯი?

სინამდვილეში არა იმიტომ რომ ალქაჯი 🙂 მიზეზი სხვაა, მაგრამ ამის ახსნას იმდენი დრო, ენერგია და სიტყვა დასჭირდებოდა, რომ ყოველთვის მეზარებოდა ეს პროცესი, თანაც არასდროს ვყოფილვარ დარწმუნებული, რომ ნამდვილი მიზეზი ანუ ის რასაც ქვემოთ დავწერ სინამდვილეში ვინმეს დააინტერესებდა, მაგრამ დღეს დავწერ 🙂

ძველ ინგლისში ალქაჯებს მოიხსენიებდნენ როგორც HAG, მაგრამ სინამდვილეში ამ სიტყვას ბევრად უფრო ძველი ფუძე აქვს და ის სათავეს რუნებიდან იღებს. HAG მომდინარეობს რუნის სახელიდან HAGALAZ. ჰაგალაზთან მჭიდროდაა დაკავშირებული ძველგერმანული სიტყვა HACHEL – ალქაჯი, ის შეესაბამება ანგლოსაქსურ სახელს HAEGTESSA – ალქაჯი, საიდანაც სწორედ წარმოსდგება სახელი HAG. შესაძლოა ბევრი რამ რასაც ახლა წაიკითხავთ ყველასთვის გასაგები არ იყოს, მაგრამ შევეცდები მაქსიმალურად გასაგებად დავწერო.

ჰაგალაზი არის მეორე ეტის პირველი რუნა. ის მდედრობითი ენეტგეტიკის მატარებელია და არის გარდამავალი “გზა” ალგხეიმისა და მუსპელხეიმის სამყაროებს შორის. (მომავალში კიდევ ბევრს დავწერ, რუნებზე, სამყაროებზე და ბევრ საინტერესო რამეებზე, ახლა კი არ დაიძაბოთ და უბრალოდ სახელებად აღიქვით წინათქმული, ამ კონკრეტულ შემთხვევაში ეს ნაკლებად მნიშნელოვანია)

რუნა ჰაგალაზი როგორც ვთქვი მდედრობითი ენერგეტიკის მატარებელია, ის აერთიანებს ორ სტიქიას წყალს და ჰაერს. შესაბამისად ის ყინულია, ასევე გამოისახება როგორც ფიფქი. არ ვიცი რამდენად კარგად ერკვევით ასტროლოგიაში, მაგრამ ყველა თქვენგანმა იცის ზოდიაქოს რომელ ნიშანს მიეკუთვნება, აი ეგ რაც თქვენ იცით პირად რუკაში მხოლოდ მზით გამოისახება, მაგრამ ასევე ყველა თქვენგანს იმავე რუკაში აქვს სხვა პლანეტებიც რომელიც სხვადასხვა ნიშნებშია გაფანტული და საბოლოოდ თქვენ და თქვენი არსებობის ყველა სხვა ალტერნატიულ “თქვენებს” გქმნით. მზე ანუ ის ნიშანი რაც თქვენ იცის გამოგხატავთ არა თქვენ სრულყოფილად, არამედ მხოლოდ თქვენს გარსს, თქვენს ცნობიერს. მთვარე – გამოხატავს ქვეცნობიერს. შესაბამისად როდესაც კითხულობთ ნიშნის აღწერას რომელშიც მზე გყავთ ეს ნიშნავს, რომ თქვენ ასე აცნობიერებთ თქვენს არსს. ხოლო როცა გაეცნობით იმ ნიშანს რომელშიც მთვარე გყავთ მაშინ გაეცნობით თქვენი ქვეცნობიერის ნაწილს. რა შუაში ეს? განვაგრძობ…

რუნა ჰაგალაზი – დედა რუნა. ის თავისი ფორმით ყველა დანარჩენ რუნას აერთიანებს. ამიტომაც მას ეძახიან დედარუნას. ჰაგალაზი როგორც ვთქვი გაყინული წყლისგან შედგება და ის სეტყვის სტიქიის მმართველია. სეტყვა გამანადგურებელია დიახ. მხოლოდ ისევე როგორც სეტყვა განადგურების შემდეგ დნება და იქცევა სიცოცხლის მომტან წყლად. ასევეა ჰაგალაზი ის ანადგურებს, რომ განავითაროს. ამიტომ ლოგიკურია რომ ჰაგალაზი არ არის სამყარო ის არის გარდამავალი გზა/პერიოდი სამყაროებს შორის, სიკვდილი არა როგორც შედეგი არამედ როგორც პორცესი/გარდასახვა/რეინკარნაცია. და მივედით ყველაზე საინტერესო ჰაგალაზის ოკულტურ და ფსიქოლოგიურ მნიშვნელობამდე. ის რაც ჩვენს თავებშია იმის მიუხედავად იცით თუ არა ამის არსებობის შესახებ. ვსაუბროდი სიკვდილზე. ცოცხლებისთვის კი მკვდრები ასოცირდებიან წარსულთან. აქ გავიხსენებ სკანდინავიურ მითოლოგიას სამყაროს შექმნის შესახებ, როდესაც ეთუნხეიმიდან მოვიდა სამი გოლიათი (მდედრობითი სქესის), იგივე ნორნები – ბედისწერის ქალღმერთები, ისინი სამივე ერთად განასახიერებენ დროს რომელშიც სამყარო არსებობს. ვერდანდი განასახიერებდა აწმყოს, სკულდი – მომავალს, ხოლო ურდი განასახიერებდა წარსულს შეგვიძლია ის ჰაგალაზის რუნის ეზოთერულ მმართველადაც მივიჩნიოთ. გამოდის რომ ჰაგალაზი მართავს წარსულს? არა! პირიქით წარსულის “მქსოველი” ბედისწერის ნორნა განაგებს ჰაგალაზს. მაშინ რას განაგებს ჰაგალაზი?

განასახიერებს თუ არა ჰაგალაზი სიკვდილს ან წარსულს? ეს ძალიან პრიმიტული გაგებაა. წარსული არის ჩვენთვის წარსული, რომელიც ოდესღაც იყო აწმყოც და მომავალიც, ისევე როგორც სიკვდილი არის შედეგი ცოცხლებისთვის, პროცესი მომაკვდავისთვის და განცდილი გარდაცვლილთათვის, მხოლოდ ეს ბოლო გაუცნობიერებელი და ამაში ბევრი არ დამეთანხმება სავარაუდოდ ვინც წაიკითხავს. დამშვიდდით და ღრმად ისუნთქეთ, რადგან ეს მხოლოდ დასაწყისია 🙂 მივედით წრემდე. ნუ ჩემი გამოცდილებით, რადგან მე მქონია მცდელობა ამ ყველაფრის ვერბალურად გადმოცემის, ამ მომენტში ყველა თუ არა ბევრი მაინც წამოიძახებს ხოლმე “ანუ წრეზე დავდივართ?” არა, წრეზე არ დავდივართ!

განვაგრძობ, ჰაგალაზი არის განადგურების რუნა, ამ სიტყვას ვინახავდი არ მინდოდა თავშივე მეთქვა, თუმცა დარწმუნებული ვარ, რომ ბევრს, ვინც კითხულობთ ეს სიტყვა ჯერ კიდევ არასწორად გესმით, ანუ ისე როგორც მე მას არ ვგულისხმობ. განადგურება როგორც ელემენტი პროგრესის, იმისათვის რომ ზემოთწამოძახებული წრიდან გამოვიდეთ და არ ვიაროთ მართლაც წრეზე. ის ბუნებრივი ცვლილებების მამოძრავებელი ძალაა, აუცილებელი იმისათვის, რომ დაკარგული ბალანსი აღადგინოს სამყაროში და შექმნას განვითარების და წინსვლისთვის სასურველი გარემო. ჰაგალაზი არის რუნა რომელიც ერთი შეხედვით გამანადგურებელი, უმართავი ენერგიის ამოფრქვევას გავს, მაგრამ სინამდვილეში ის ტრანსფორმაციის და განახლების უდიდეს პოტენციალს ფლობს და განწმენდის სიმბოლოა, რომელიც კონკრეტულ სიტუაციებში აუცილებელი საფუძველია განვითარებისთვის.

ჰაგალაზი როგორც განადაგურების რუნა. ის არ არის აბსოლუტური განადგურების აღმნიშვნელი. ის გამორჩევით განადგურების აღმნიშვნელია, სხვანაირად რომ ავხსნა ანადგურებს იმას რამაც თავისი დრო მოჭამა, რასაც აღარ აქვს უფლება არსებობისთვის, რაც თავისი არსებობით ხელს უშლის წინსვლას. რუნა აქტიურად გამოიყენებოდა მაგიაში, ამიტომ მეომრები მას ხშირად გამოიყენებდნენ მოსალოდნელი ბრძოლის წინ, როგორც ნათქვამია ცოდვების და შეცდომებისგან გასათავისუფლებლად რომ ბრძოლისას ისინი სრულყოფილნი ყოფილიყვნენ და მათი გონება ვნებებსა და ცდუნებებს არ გაეფანტათ.

ჰაგალაზი როგორც ვთქვი ანადგურებს იმას რამაც დრო მოჭამა, არა ზემოდან, არამედ აცლის ფეხებიდან მიწას, რაზეც დგას, რასაც ეყრდნობა, აცლის საფუძელს იმას რასაც ანადგურებს. ძირფესვიანად აცალმტვერებს. არის მკვეთრი და ძლიერი. მე ზემოთ მეწერა სიკვდილზე და წარსულზე. ფსიქოლოგიური თვალსაზრისით ჰაგალაზი ანადგურებს კომპლექსებს, რომელიც ხელს გვიშლის წინსვლაში და ჩვენს დესტრუქციულ წარსულს განასახიერებს.

ჰაგალაზი არსებობის უპირველეს კანონს ეფუძვნება, ყველაფერი რაც ოდესღაც დაიბადა უნდა მოკვდეს, ყველაფერი რაც დაიწყო უნდა დასრულდეს. მითოლოგიურად ჰაგალაზი მთლიანად შეესაბამება ხელხეიმს და მის მმართველს ხელს. ხელი ბნელი დედოფლის და ლოკის შვილია. ის აბსოლუტურად არ არის პირველქმნილი არსება, ის როგორც ჰაგალაზი მხოლოდ მაშინ ჩნდება როცა მისი არსებობის აუცილებლობა იქმნება. ჰაგალაზი, ის ჩნდება მაშინ როცა აუცილებელია გარდაქმნა, ის არ არსებობს თავისთავად და უწყვეტად, მას ქმნის აუცილებლობა განადგურების. ისევე როგორც სიკვდილი არსებობს კონკრეტული ადამიანისთვის, მაშინ როდესაც ის კვდება. ისევე როგორც ვუშვებთ რომ სამყაროში არსებობს უამრავი რამ რის შესახებაც ჩვენ შესაძლოა არც კი ვიცოდეთ, მაგრამ ისინი არსებობენ. ასევე შესაძლოა რიგ შემთხვევებში ჩვენ ვიცოდეთ რაიმეს არსებობის შესახებ, მაგრამ ის არ არსებობდეს – სიკვდილი, მხოლოდ ჩემი, შენი და ვიღაცის. ის მოვლენაა, რომელიც ძალიან კონკრეტული და ინტიმურია, იმის მიუხედავად იცი თუ არა მისი არსებობის შესახებ, ის არ არსებობს იქამდე სანამ არ დგება მომენტი სიკვდილის. ეს ერთობლივია პროცესია, ორმხრივი, რომელსაც იწვევს ადამიანი, არ აქვს მნიშვნელობა ეს სუიციდი იქნება თუ უბრალოდ დაბერება, გაცნობიერებული თუ გაუცნობიერებელი. მიზეზი გამომწვევი არის ადამიანი, პროცესი კი არის ერთობლივი და უნიკალური. ამ კონტექსტში ჰაგალაზი არის არა განადგურება, არამედ შექმნა პირობის, რომ ადამიანს ქონდეს საშუალება რეინკარნაციის – თავიდან დაბადების. სწორედ ამიტომ ჰაგალაზი ასევე განასახიერებს პირველყოფილ ქაოსს, მაგრამ რამდენადაც პარადოქსულად არ უნდა მოგეჩვენოთ ქაოსის ყველა მამოძრავებელი ძალა ხელთან ერთ დონეზე თანაბრდება, ვგულისხმობ იმას რომ ეს ძალები, ქაოსის ძალები ემსახურებიან კოსმიურ ძალებს, ხოლო სიკვდილი მხოლოდ ეხმარება იმაში რომ აღდგეს ბალანსი, ბალანსი რომელსაც არღვევს სიცოცხლე. ჰაგალაზი განასახიერებს სიკვდილისა და სიცოცხლის ყველაზე ღრმა კავშირს სტიქიებთან, რომლებიც სრულიად არ არიან დაუმორჩილებლები.

სკანდინავიურ მითოლოგიაში ხეიმდალი – საწყისის ასი ასევე შეესატყვისება რუნა ჰაგალაზს, ხეიმდალი, თეთრი ასი, რომელიც სამყაროების გზაჯვარედინზე დგას და იცავს სამყაროს შექმნის საწყისს, ერთმანეთთან აკავშირებს ურთიერთსაპირისპირო სამყაროებს და იცავს მათ შორის ბალანსს. ხეიმდალი არის არა მარტო სიცოცხლის მამა, წერტილი საიდანაც ყველაფერი იწყება, ის ასევე განასახიერებს სიკვდილსაც, წერტილს სადაც მთავრდება. სწორედ ამიტომ ჰაგალაზის რუნა როგორც დასაწყისში ვთქვი დედა რუნადაც მოიხსენიება, ის ყველა სხვა რუნას აერთიანებს თავის თავში და გზაჯვარედინს განასახიერებს. სამყაროების გზაჯვარედინს.

ასტროლოგიაში ჰაგალაზი შეესატყვისება მერწყულის ნიშანს, მერწყული ჰაერის სტიქიით არის მართული. მას ხშირად ადარებენ სუნთქვის გაჩერებას, როდესაც რაიმე ისეთი დამანგრეველი ისე სწრაფად ცვლის ყველაფერს, რომ სუნთქვა გეკვრით და როდესაც ჩაისუნთქავთ უკვე ყველაფერი სხვაგვარადაა. აი ასეთი სწრაფი, ძლიერი და დამანგრეველია ჰაგალაზი, მაგრამ აუცილებელი. როდესაც რუნებში მე ამომდის ხოლმე ჰაგალაზი ვხვდები რომ ამ კონკრეტულ სიტუაციაში არაფრის გაკეთებას არ აქვს აზრი, სანამ ყველაფერი თავისთავად და ერთბაშად არ შეიცვლება და როდესაც ეს ხდება, შემდეგ მშვიდად განვაგრძობ მოქმედებას.

ასტროლოგიაში ჰაგალაზის მოქმედებას კარმულ ვალსაც უკავშირებენ. კარმული ვალი, მარტივად რომ ავხსნა იმის შედეგია როგორც ჩვენ ვიცხოვრეთ უკვე. შეცდომები რომელიც უნდა გამოვასწოროთ. ადამიანები რომლებიც არ ცნობენ კარმულ კანონებს, ხშირად კარმულ ვალს ჰაგალაზის მოქმედების სფეროში იხდიან – ანუ მტკივნეულად. ვგულისხმობ როდესაც ადამიანის მიერ დაშვებული შეცდომები იმდენად მნიშნელოვანი და მძიმეა და ის იმდენად ვერ ხვდება ამას და არ აკეთებს არაფერს, მისი გარდასახვა ხდება მტკივნეული და შესაძლოა დამანგრეველი მისთვისვე.

ჰაგალაზის მოქმედება უფრო მარტივად რომ ავხსნა კარმული თვალსაზრისით გავს მეხს, რომელიც დაარტყამს ტყვეს და მას ბორკილებს ახსნის, თუმცა უკვე ტყვეზეა დამოკიდებული რამდენად შეეჩვია ის ბორკილებს და მოუნდება თუ არა მათ გარეშე სიცოცხლე. ამის მიუხედავად ეს მისთვის ახლის დასაწყისია.

როგორც ვთქვი ჰაგალაზის რუნა უკავშირდება მერწყულის ნიშანს. მერწყული განასახიერებს მომავალს, რომელიც იჭრება აწმყოში. მომავლის აწმყოში შემოჭრას უკავშირდება ძველი ჩარჩოების, შეხედულებებისა და დამოკიდებულებების განადგურება.

ჰაგალაზი ძალიან მძიმედ სატარებელი რუნაა, ის ადამიანს ემუქრება ფსიქიკური აშლილობითაც თუ მას არასწორად მოიხმარს. როდესაც ადამიანი იციკლება, იკეტება, როდესაც მისთვის რაიმე, ღირებულება იქნება ეს, შეხედულება თუ სხვა რამ ხდება უცვლელი. როდესაც ის თავიდანვე გამორიცხავს რაიმეს ცვლილებას, საკუთარი აზრებისასაც კი. როდესაც ამბობ რომეს ასეა და სხვანაირად ვერ იქნება და გამორიცხავ იმას რომ ოდესმე შეიცვლი აზრს და იციკლები ამაზე. სწორედ მაშინ ამუშავდება ჰაგალაზი. ის განასახიერებს ნაჭუჭის გამომტვრევას და არა მასში ჩაკეტვას, თუმცა ბევრი ადამიანი ზუსტად მისი მოქმედების შემდეგ იკეტება ნაჭუჭში და ეს მტკივნეული ხდება ისევ მათთვის, ასეთ შემთხვევაში ჰაგალაზს მიყავს ის ეგოს განადგურებამდე.

ჰაგალაზი მითოლოგიურად ასევე ასოცირდება დიონისესთან, დიონისე კი ასტროლოგიაში ასოცირდება ლომთან, ლომი კი მერწყულის ოპოზიციაა. ანუ მისი საპირისპირო. ხშირად არასწორად იგებენ, უფრო სწორად ერთმნიშვნელოვნად იგებენ სიტყვას “ოპოზიცია”. სინამდვილეში ერთმანეთის ოპოზიციურ ნიშნებს კი აქვთ შანსი ერთამენთს აბსოლუტურად არ დაეთანხმონ, მაგრამ სამაგიეროდ აქვთ ასევე შანსი ერთამენთი ისე შეავსონ როგორც არავინ სხვამ. რადგან ისინი ერთმანეთის აბსოლუტურ ორ საპირისპოროს, ორ აბსოლუტურად განსხვავებულს წარმოადგენენ, მაგრამ ერთი ფლობს იმას, რაც არ აქვს მეორეს. ეს ერთი მთლიანის ორი ნახევარია. მერწყულისთვის ასეთია ლომი 🙂 და პირიქით.

დავუბრუნდეთ დიონისეს. მერწყული ეს მომვლიდან აწმყოში შემოჭრილი რევოლუციონერია. ლომი ეს რევოლუციის შედეგად ტახტზე ასული მონარქია, რომელსაც აქვს შანსი შექმნას ახალი კანონები და დაამყაროს მშვიდობა.

ყურადღებით თუ გაეცნობით მისტიკების, ხელოვანების და სხვა ცნობილი ადამიანების ბიოგრაფიებს, მათი შექმნა შედეგია რაღაც ფაქტის, გადატრიალების, განადგურების რაც მოხდა მათ ცხოვრებაში, ანუ ჰაგალაზის გამოვლინების. იმის თქმა მინდა რომ კოსმოსი ადამიანს ავითარებს ჰაგალაზის მეშვეობით. ე.წ. გამოღვიძების/გამოფხიზლების იდეა იმაში მდგომარეობს, რომ ადამიანი უნდა გათავისუფლდეს ჩვეულისგან და დაიწყოს ფიქრი სხვაგვარად, რადგან ზუსტად ჩვევები არ აძლევს მას განვითარების საშუალებას.

და ბოლოს დავამთავრებ ფრაზით რომელიც დაახლოებით იმდენივე წლის წინ ვთქვი, რამდენი წელიც ვატარებ რუნას ჩემს სახელად.

ადამიანი არ ირჩევს გზას, ადამიანი თვითონ არის გზა.

მათ ვინც ეს დამღლელი და გაუგებარი პოსტი ბოლომდე წაიკითხა, წარმატებულ წელს ვუსურვებ და ბევრ დადებით, უმტკივნეულო ცვლილებას. ჩემს თავს კი ვეტყვი, კეთილი იყოს შენი დაბრუნება ჰაგ 🙂

Older Entries

%d bloggers like this: